Hamro Bulletin

बैतडीको दोगदाकेदार गाउँपालिकामा १७ वर्षीया किशोरीको बलात्कारपछि हत्या भएको छ । दोगडाकेदार गाउपालिका-७ चडेपानी (कतोला) घर भई गाउँपालिकाको भवन नजिकै रहेको सनातन धर्म माविमा कक्षा १२ मा अध्ययनरत किशोरी भागरथी भट्टको विद्यालयत्रबाट घर फर्किने बेला बाटोमा पर्ने जंगलमा बलात्कारपछि हत्या भएको हो ।

बुधबार बिहान घरबाट विद्यालय गएकी भागरथी बेलुकी पनि नफर्केपछि आफन्तले खोजी गर्दा बिहीबार बेलुकी मात्रै घरभन्दा ३ किलोमिटरको दुरीमा रहेको लबलेक सामुदायीक बनमा उनको विभत्स हत्या गरिएको शव फेला परेको थियो । 

उनको शव ईलाका प्रहरी कार्यालय खोचलेक र विद्यालय देखि झण्डै दुई किलोमिटरको दुरीमा घाँटी निमुठिएको, हातमा घारिलो हतियार प्रयोग भएको र बलात्कार गरी आधा शरीर निवस्त्र पारिएको अवस्थामा फेला परेको जिल्ला प्रहरी कार्यालय बैतडीले जनाएको छ । 

कञ्चनपुरकी निर्मला पन्तको जस्तै निर्मम र विभत्स तरिकाले हत्या भएको थाहा पाएपछि बिहीबार राती नै बैतडीका प्रहरी प्रमुख डिएसपी नारायण प्रसाद अधिकारी घटनास्थल पुगेका थिए । घटनास्थल, जिल्ला सदरमुकाम गोठलापानीबाट मोटरमा झण्डै डेढ घण्टामा पुगिन्छ ।

किशोरीको हत्या भएको थाहा पाएपछि, बैतडीका प्रमुख जिल्ला अधिकारी मोहनराज जोशी, सरकारी वकिल, जिल्ला अस्पतालका चिकित्सक, सशस्त्र प्रहरीको टोली पनि शुक्रबार विहान घटनास्थल पुगेका छन् । प्रमुख जिल्ला अधिकारी जोशीले किशोरीको बलात्कार पछि हत्या भएको अनुमान गरिएको बताए ।

'फरेन्सिक टीम बोलाइएको छ, शवलाई घटना मुचुल्का गरी जिल्ला अस्पताल लगिएको छ, त्यहाँ चिकित्सहरुको टोलीले पोस्टमार्टम गरेपछि मात्रै विस्तृतमा भन्न सकिन्छ,' प्रमुख जिल्ला अधिकारी जोशीले भने ।

प्रमुख जिल्ला अधिकारी जोशीले, किशोरीको बलात्कारपछि हत्यामा संलग्न छिट्टै पत्ता लाग्ने र उनीहरुलाई कानुनी दायरामा ल्याउने बताए । प्रहरीले घटनास्थलमा ब्याट्री झिकेर फालिएको अवस्थामा मोबाइल फेला पारेको छ । मोबाइलका सूचना केलाउने कार्य पनि प्रहरीले गरिरहेको छ ।

किशोरीको बलात्कारपछि हत्या भएको खबर पाएपछि, प्रदेश सरकारको तर्फबाट संघीय प्रहरी कार्यालय धनगढीका एसएसपी जनक पाण्डेसहितको टोली घटनास्थल गएको छ । धनगढीबाट तालिम प्राप्त कुकुर पनि घटनास्थल लगिएका छन् । 

खोचलेक-चडेपानी कच्ची सडकको लवलेक (स्थानीय भाषमा लडालेक)को विच जंगलमा सडक आसपासमा बलात्कार गरेपछि, घिसारेर सडकदेखि ५०/६० मिटर तल झाडिमा शव फालिएको फेला परेको मृतक बालिकाका दाइ नाता पर्ने स्थानीय शिवराज भट्टले बताए ।

मृतक किशोरीका बुवाको एक महिना अघि धनगढीमा उपचारका क्रममा मृत्यु भएको थियो । किरियामा रहेका उनका दाइ केही दिनअघि मात्रै किरिया सकेर भारततिर लागेका थिए । 'घरमा एक्लै आमा भएको भन्दै अभिभावकबिहीन भएको मौका छोपेर बलात्कार भएको हुनसक्छ,' आफन्त शिवराज भट्टले भने ।

सो क्षेत्रका प्रदेशसभा सदस्य लिलाधर भट्टले हत्यामा संलग्न जो कसैलाई पनि कानुनी दायरामा ल्याउन माग गरे । प्रदेशसभा सदस्य भट्ट पनि घटनास्थल पुगेका छन् । उनले, मृतककी आमालाई भेटेर अपराधीलाई पत्ता लगाइ कानुनी दायरामा ल्याएर भागरथीलाई न्याय दिलाउने आश्वासन दिए ।

सुदूरपश्चिम प्रदेश प्रहरी प्रमुख डिआईजी उत्तम सुवेदीले बैतडीमा भएको किशोरीको हत्या घटनालाई गम्भीरताका साथ लिएको बताए । उनले, घटनाको अनुसन्धानका लागि संघीय प्रहरी इकाइ कार्यालय कैलालीबाट एसएसपी पाण्डेको नेृत्वमा, सीआइबीसहितको अनुसन्धान टोली शुक्रबार नै बैतडी पठाएको बताए ।

'तालिम प्राप्त कुकुरको टोली घटनास्थल पुगिसकेको छ । सिआइबी र टेक्निकल अनुसन्धान टोली पनि बैतडी पठाएको छु, घटनामा टेक्निकल अनुसन्धान सुरु भइसकेको छ, ' डिआइजी सुबेदीले भने । 

विद्यार्थी आन्दोलित

विद्यालय नजिकैको जंगलमा बलात्कार पछि हत्या भएको बन्दै सनातन धर्म माविका विद्यार्थीहरुले शुक्रबार खोचलेकमा प्रदर्शन गरी अपराधीलाई अविलम्ब पत्ता लगाउन माग गरेका छन् । 

विद्यालयबाट निस्केर ईलाका प्रहरी कार्यालय नजिकै रहेको खोचलेक बजारमा विद्यार्थीले प्रदर्शन गरेका हुन् । उनीहरुले कुनै पनि बहानामा बलात्कार पछि हत्यामा संलग्नको खोजिमा लापरवाही नगर्न चेतावनी दिएका छन् ।