मेस्सीले उचाले आफ्नो पहिलो महादेशीय उपाधि, अर्जेन्टिना २८ वर्षपछि कोपा अमेरिका च्याम्पियन
जारी कोपा अमेरिका २०२१ को उपाधि अर्जेन्टिनाले जितेको छ। अर्जेन्टिनाले आफ्नो पुरानो तथा बलियो प्रतिद्वन्द्वी ब्राजिललाई १-० गोलले पराजित गर्दै २८ वर्षपछि महादेशीय उपाधि चुमेको छ।
ब्राजिलको रियो डे जिनेरोस्थित ‘माराकाना’मा भएको खेलमा अर्जेन्टिनाले पहिलो हाफमा उत्कृष्ट प्रदर्शनी देखायो। एट्याक र डिफेन्स दुवैमा निकै सन्तुलित देखिएको अर्जेन्टिनाले ब्राजिलको एट्याकलाई पटक पटक विफल पार्न सफल भएको थियो।
दुवै टोलीले निकै प्रतिस्पर्धात्मक खेल प्रस्तुत गरेपनि खेलमा अग्रता भने अर्जेन्टिनाले लिन सफल भयो। पहिलो हाफको २२औं मिनेटमा अर्जेन्टिनी फरवार्ड एन्जल डि मारियाले शानदार गोल गर्दै अर्जेन्टिनालाई खेलमा अग्रता दिलाए। रोड्रिगो डे पलको उत्कृष्ट लङ पासमा डि मारियाले ‘चिप शट’ प्रहार गरेका थिए।
दोस्रो हाफमा ब्राजिलले आफ्नो अग्रपंक्तिमा केहि खेलाडी प्रतिस्थापन गर्यो। त्यसपछि खेलमा निकै बलियो देखिएपनि ब्राजिलको कुनै पनि एट्याकले बराबरी गोल भेट्टाउन सकेन। खेलमा ब्राजिलले गोल नगरेको भने होइन। दोस्रो हाफको ५२ मिनेटमा ब्राजिलियन स्ट्राइकर रिचारलिसनले गोल गरेका थिए तर उनी अफसाइड रहेको भन्दै सो गोल खारेज गरिएको थियो।
यस संस्करणको कोपा अमेरिकामा पहिलो पटक दर्शकलाई अनुमति दिइएको खेलमा ७,८०० दर्शकमाझ दुवै टोलीले निकै आक्रामक खेल प्रस्तुत गरेका थिए। निर्धारित ९० मिनेटको समयमा ९ पहेंलो कार्ड प्रदान गरिएको खेलमा धेरै चर्काचर्की भएका थिए।
यस जितसँगै अर्जेन्टिनाले आफ्नो सबै भन्दा ठूलो प्रतिद्वन्दी ब्राजिललाई उसैको घरेलु मैदानमा पराजित गर्दै २८ वर्षपछि कोपा अमेरिका उपाधि उचाल्न सफल भएको हो। त्यस्तै अर्जेन्टिनी कप्तान लियोनल मेस्सीको पनि अर्जेन्टिनी जर्सीमा यो पहिलो प्रमुख उपाधि हो। सन् २०१४ को फिफा विश्वकप फाइनल र सन् २०१५ को कोपा अमेरिका फाइनलमा पराजय भोगेका मेस्सीले आफ्नो पहिलो अन्तर्राष्ट्रिय तथा कोपा अमेरिका उपाधि उचालेका छन्।
सम्बन्धित समाचार
ट्रेन्डिङ
ताजा अपडेट
-
भीम रावललाई निषेध माथि निषेध गर्ने प्रपञ्च
-
छैठौं साँफेबगर महोत्सबको आय व्यय सार्वजनिक ९३ लाख संकलन, ५२ लाख बढि बचत
-
छैठौं साँफेबगर महोत्सबको आय व्यय फाल्गुन ३० गते सार्वजनिक गरिने
-
ट्रकबाट सल्किएको आगोले कर्णाली पुलमा भएको क्षतिको अध्ययन गर्दै प्राविधिक टोली
-
अछामको जनकल्याण माध्यमिक बिधालयमा बढी शुल्क लिएको भन्दै तालाबन्दी
प्रतिक्रिया